У інстытуце працуюць акадэмікі М.А. Ізобаў, В.І. Карзюк, члены-карэспандэнты В.В. Гарахавік, П.П. Матус; працавалі акадэмікі Я.А. Барбашын, М.П. Яругін (дырэктар з 1959 па 1977 г.), У.І. Крылоў, У.П. Платонаў (дырэктар з 1977 па 1992 г.), У.Г. Спрынджук, Д.А. Супруненка, С.А. Чуніхін, І.В. Гайшун (дырэктар з 1992 па 2018 г.), В.І. Янчэўскі, члены-карэспандэнты Э.І. Груда, А.Я. Залескі, Я.А. Іваноў, Л.А. Яновіч, Ф.М. Кірылава.

Інстытут падтрымлівае актыўныя творчыя сувязі з вядучымі навуковымі ўстановамі многіх краін (Германія, Францыя, Бельгія, Расія, Грузія, Украіна, Грэцыя, Італія, Польшча, Аўстрыя, Кітай, ЗША, Вялікабрытанія, Данія, Швейцарыя, Чэхія, Сербія, Японія, Балгарыя), з’яўляецца арганізатарам шэрагу міжнародных канферэнцый, школ, сімпозіўмаў.

Дасягненні вучоных адзначаны Ленінскай прэміяй (1978), Дзяржаўнымі прэміямі СССР (1970, 1972), Дзяржаўнымі прэміямі БССР (1974, 1978, 1982), Дзяржаўнымі прэміямі Рэспублікі Беларусь (1998, 2000, 2004), прэміяй Савета Міністраў СССР (1986), прэміямі Ленінскага камсамола (1970, 1987) і Ленінскага камсамола Беларусі (1976, 1984, 1990), прэміямі НАН Беларусі (1993, 1995).